Category: Lajme

Qeveria e Kosovës në mbledhjen e saj të fundit për vitin 2024 ka marrë vendim që t’i shtojë sanksionet ndaj Rusisë, raporton Anadolu.

Në mbledhjen e kabinetit qeveritar, zv.ministrja e Punëve të Jashtme dhe Diasporës, Liza Gashi, tha se nga fillimi i agresionit luftarak të Rusisë kundër Ukrainës në shkurt 2022, Kosova shprehu solidaritet me popullin ukrainas.

“Në përputhje me pakon e re të 14-të të sanksioneve të BE-së kundër Rusisë të datës 24 qershor dhe në përgjigje të vazhdimit të agresionit rus, është e domosdoshme që Kosova të aprovojë propozimin e ri për masa shtesë”, theksoi Gashi.

Sanksionet, sipas zv.ministres. përfshijnë zgjerimin e listës së personave/entiteteve të sanksionuar me individë apo organizata të reja të ndërlidhura me aktivitetet ushtarake të Rusisë; kufizime të reja sikurse ndalimi i eksporteve të teknologjisë së avancuar dhe mallrave që kanë impakt në kapacitetet industriale dhe ushtarake të Rusisë, si dhe ndalimi i importeve.

Gjithashtu sanksionet përfshijnë edhe sektorin e gazit të lëngshëm natyror, me masë kundër 50 anijeve që Rusia i përdorë për të anashkaluar kufizimet në transportin e naftës dhe karburanteve.

“Duke miratuar këto masa, vendi ynë konfirmon përkushtimin ndaj vlerave demokratike dhe rendit ndërkombëtar si një partner i besueshëm në përpjekje të botës së lirë, për të ndaluar agresionin rus”, shtoi Gashi, para votimit unanim të kabinetit qeveritar.

Më shumë se 200,000 shtëpi në të gjithë Bosnje – Hercegovinën janë pa energji elektrike për të dytën ditë të mërkurën, kanë thënë autoritetet, pasi një stuhi dëbore një ditë më parë shkaktoi probleme të mëdha në disa vende të Ballkanit.

Kryesisht në Bosnjën veriperëndimore dhe qendrore, qytetet dhe fshatrat pësuan ndërprerje të vazhdueshme të energjisë, kanë bërë të ditur dy ndërmarrjet e energjisë elektrike të vendit, raporton Reuters.

Reshjet e borës kanë pushuar të mërkurën, kur popullata katolike po feston Krishtlindjet, por shumë rrugë mbetën të bllokuara, duke ndërprerë hyrjen në qytete dhe fshatra.

“Ekipet tona janë në vend gjatë gjithë kohës, duke bërë gjithçka në fuqinë e tyre”, ka thënë Jelena Markoviç, zëdhënëse për kompaninë e shpërndarjes Elektroprenos BiH. Shumica e linjave të transmetimit janë në zona të paarritshme, sipas saj.

Në Kroacinë fqinje, ekuipazhet e emergjencës kanë thënë se shpëtuan 48 persona që ishin varrosur në dëborë në rajonin qendror të Likës.

Në Slloveni, autoritetet kanë thënë se erërat e forta dhe bora e bënë të pamundur që një helikopter shpëtimi të arrinte një alpinist hungarez i cili është bllokuar në Alpe që nga e diela.

Qeveria e Kosovës ka ndarë 1 milion e 108 mijë e 529 euro si mbështetje për të gjitha familjet shqiptare nga Lugina e Preshevës që merren në mënyrë aktive me bujqësi.

Vendimi është marrë të mërkurën në një mbledhje online, sipas thirrjes publike të Këshillit Kombëtar Shqiptar

“Ndarë 1,108,529 Euro mbështetje për të gjitha familjet shqiptare nga Presheva, Medvegja dhe Bujanoci, qё nё mënyrë aktive merren me bujqësi sipas thirrjes publike të Këshillit Kombëtar Shqiptar (KKSh), përfshirë këtu financimin për programet nga thirrja publike e KKSh-së për avancimin dhe socializmin e fëmijëve me nevoja të veçanta”, thuhet në komunikatë

Qeveria ka aprovuar rregulloren për procedurat dhe kushtet e financimit të organizatave sportive dhe ka aprovuar kërkesën e Ministrisë së Financave, Punës dhe Transfereve për kursime dhe ndarje.

Serbia kishte kërkuar që të anulohet konkursi për përfitime të subvencioneve nga Kosova, për bujqit e Luginës së Preshevës.

Zëdhënësi i KEDS-it Lulzim Krasniqi, ka dhënë përgjigje lidhur me raportimet se disa pjesë të Drenicës, janë pa rrymë për mbi më shumë 24 orë.

Ai për Klankosova.tv tha se disa vende të Kosovës kanë mbetur në këtë gjendje si pasojë e konsumit të lartë dhe rekord të energjisë elektrike, ndërsa theksoi se s’bëhet fjalë për reduktime ose ndalesa.

“Për shkak të konsumit të lartë dhe rekord, që së fundi po shkon deri në 1500 MW/h, po shkaktohen ngarkesa në asetet elektroenergjetike të KEDS-it në disa vende në Kosovë. Rrjedhimisht nuk bëhet fjalë për reduktime të energjisë elektrike ose ndalesa”, deklaroi Krasniqi.

“Lusim qytetarët tanë që të kursejnë energjinë elektrike sa më shumë që munden, në mënyrë që të mos rrezikohen këto astete. Kursimi i saj mundëson operim më tumirë të rrjetit dhe shërbim më efikas”, shtoi ai.

Ndërsa përmes një njoftimi zyrtarë është bërë e ditur se kërkesa për energji elektrike është në nivelet më të larta historike, duke arritur deri në 1500 megavatë në orë.

Tutje është bërë e ditur se shpenzimi i tillë nuk është shënuar asnjëherë më parë në historinë e furnizimit me energji elektrike.

Njoftimi i plotë:

Ditëve të fundit kemi qenë dëshmitarë të ftohjes së motit. Të njëjtën kohë, mijëra bashkatdhetarë kanë ardhur për t’i kaluar festat e fundvitit në vendlindje. Kjo ka bërë që kërkesa për energji elektrike të rritet në nivelet më të larta historike, duke arritur deri në 1500 megavatë në orë. Shpenzimi i tillë nuk është shënuar asnjëherë më parë në historinë e furnizimit me energji elektrike.

Deri te kjo situatë ka ardhur pasi një pjesë e konsiderueshme e qytetarëve janë duke u ngrohur me energji elektrike. Kjo ka bërë që disa pjesë të vendit të mbingarkohen tej mase, duke rrezikuar edhe djegien e aseteve të rrjetit distributiv.

Në të njëjtën kohë, pasi prodhimi vendor nuk po mjafton as përafërsisht që të mbulohet kjo kërkesë, po importohet një sasi e konsiderueshme e saj me çmime dukshëm më të larta se ato nga prodhimi vendor.

Ekipet tona janë në gatishmëri që të intervenojnë në paraqitjen e secilës situatë të papritur. Por, konsumatorët mund të ndihmojnë shumë në përballimin më të lehtë të kësaj situate.

Në këto rrethana, KEDS dhe KESCO apelojnë fuqishëm që të kursehet maskimalisht energjia elektrike, pasi kjo mundëson operim më të lehtë të sistemit, më efikas dhe më të sigurt. Po ashtu, edhe kostoja e energjisë elektrike ulet nëse varësia nga importi është më e vogël.

Një nga sugjerimet e rëndësishme për kursim është edhe përdorimi i formave alternative për ngrohje aty ku është e mundshme, në mënyrë që të ketë stabilitet të operimit në zonat ku furnizimi me energji elektrike është jetik në këtë mot të përkeqësuar dimëror.

KEDS dhe KESCO mbesin të përkushtuara që të bëjnë makismumin për të siguruar energji elektrike të bollshme për qytetarët e vendit dhe operim optimal të rrjetit të shpërndarjes.

Qytetarët po presin deri në dy orë për të hyrë në Kosovë nëpërmjet pikëkalimit kufitar Dheu i Bardhë.

Qendra Kombëtare për Menaxhim Kufitar ka publikuar gjendjen në kufij dhe me përjashtim te Dheu i Bardhë në pikat tjera kufitare situata është më e qetë.

Në Merdar pritjet janë 10-15 minuta, ndërsa në pikat tjera kufitare pritjet janë kryesisht 5 minuta.

Qeveria e Kosovës do të ndajë nga 100 euro për fëmijët dhe pensionistët për fundvit.

Këtë e ka bërë të ditur kryeministri i Kosovës, Albin Kurti të dielën gjatë një konference për media.

“Andaj edhe në këtë fundvit sipas tashmë traditës sonë nga 100 euro për fëmijët dhe pension marrësit”, ka thënë ai.

Agjencia e Statistikave të Kosovës ka publikuar rezultatet e para përfundimtare të regjistrimit.

Sipas të dhënave popullsia në Kosovë i takon 93.49 për qind besimit islam.

Ndërsa, ortodoks 2.31, katolik, 1.75, të tjerë 0.45, asnjë besim 0.50 dhe pa përgjigje 1.50.

“Sipas religjionit Kosova ka një ndryshim të vogël me vitin 2011, pra dominohet nga besimi islam. Sipas të dhënave nga regjistrimi i vitit 2024 komuniteti islam përbën 93.49 %, ortodoks 2.31%, katolik, 1.75, të tjerë 0.45, asnjë besim 0.50 dhe pa përgjigje 1.50”, ka deklaruar drejtori i ASK-së, Avni Kastrati.

Sa i përket diasporës, deri tani janë regjistruar 550,000 persona, ndërsa numri total i popullsisë rezidente në Kosovë arrin në 1,602,515 banorë.

Regjistrimi i popullsisë kishte filluar më 5 prill dhe ka përfunduar me 24 maj të këtij viti.

Presidenti turk Recep Tayyip Erdoğan shprehu solidaritet me Pakistanin kundër akteve të terrorit të kryera kundër vendit, transmeton Anadolu.

“Presidenti Erdoğan deklaroi se Türkiye qëndron në krah të Pakistanit kundër veprimeve terroriste që kërcënojnë paqen dhe sigurinë”, tha Drejtoria e Komunikimeve e Presidencës turke në një deklaratë pas një takimi midis Erdoğanit dhe kryeministrit pakistanez Shehbaz Sharif në margjinat e një samitit të grupit D-8 në Kajro të Egjiptit.

Erdoğan i tha gjithashtu Sharifit se Ankaraja mirëpret “rimëkëmbjen e ekonomisë pakistaneze dhe se përpjekjet do të vazhdojnë për të rritur bashkëpunimin politik dhe ekonomik midis dy vendeve”, shtohet në deklaratë.

Dy liderët diskutuan gjithashtu marrëdhëniet dypalëshe, çështjet rajonale dhe zhvillimet globale me Sharifin, sipas Drejtorisë së Komunikimeve.

Erdoğan ka përsëritur po ashtu angazhimin e Türkiyes për të qëndruar pranë popullit sirian gjatë procesit të tyre “historik” të transformimit pas rënies së regjimit të Bashar Asadit në fillim të këtij muaji.

Samiti D-8, i titulluar “Investimi në të rinjtë dhe mbështetja e ndërmarrjeve të vogla dhe të mesme: Formimi i ekonomisë të së nesërmes”, u hap sot në Kajro.

Grupi D-8 u krijua në Istanbul në vitin 1997 për të forcuar marrëdhëniet ekonomike dhe sociale midis vendeve anëtare, respektivisht Türkiyes, Egjiptit, Nigerisë, Pakistanit, Indonezisë, Bangladeshit, Iranit dhe Malajzisë.

Sirianët që u strehuan në Türkiye gjatë luftës civile vazhdojnë të kthehen në vendin e tyre pas përmbysjes së regjimit 61-vjeçar Baath, raporton Anadolu.

Sirianët në pikën kufitare “Öncüpınar” në Kilis, kthehen në vendin e tyre pas procedurave të tyre në Qendrën e Riatdhesimit.

26-vjeçarja Eysem Mentar, e cila erdhi në pikën kufitare për t’u kthyer në vendin e saj, falënderoi kombin turk për mikpritjen.

Mentar deklaroi se ka ardhur në Türkiye 10 vjet më parë dhe asnjë vend nuk ua ka hapur dyert. “Tani vendi ynë u pastrua, ne do të kthehemi në vendin tonë. Zoti e bekoftë popullin turk. Ne hëngrëm bukën dhe pimë ujin e saj. Türkiye do të më mungojë”, tha ajo.

Muhammet Turkmen (36), i cili u strehua në Türkiye 8 vjet më parë, tha se donte të kthehej në vendin e tij pas përfundimit të luftës në Siri.

“Unë do të doja të falënderoja shumë popullin turk dhe Recep Tayyip Erdoğan. Populli turk na trajtoi shumë mirë. Një jetë e re na pret në Siri”, tha Turkmen.

Duke u shprehur se është kasap, Turkmen tha se do të vazhdojë profesionin e tij në vendin e tij.

Kosova dhe Serbia kanë arritur deri tek një pajtim për zbatim të plotë të deklaratës së përbashkët për personat e zhdukur në luftë, raporton Anadolu.

Ky pajtim u arrit midis kryenegociatorit të Kosovës, Besnik Bislimi dhe atij të Serbisë, Petar Petkoviq, me ndërmjetësimin e Bashkimit Evropian (BE) në kuadër të dialogut Kosovë-Serbi në Bruksel.

Pas përfundimit të takimit, Bislimi, njëherësh zv/kryeministër i Kosovës, tha se në takimin trepalësh ka pasur pajtim për zbatim të plotë të deklaratës për personat e zhdukur.

“Jemi marrë vesh që të pranohet versioni i dhjetorit i termave të referencës për komisionin e përbashkët, kur Serbia kishte paraqitur pengesa dhe si duket tani i ka tërhequr ato, prandaj mendoj se tani mund të ecim tutje ku gjatë muajit të ardhshëm do të mbahet mbledhja e parë e këtij komisioni të përbashkët”, tha ai.

Sipas Bislimit, ka premtime nga ana e Serbisë se nuk do të ketë tendenca për pengimin e punës së këtij komisioni të përbashkët, i cili do të fillojë të merret me këto çështje që nga janari.

Në vitin 2023, Kosova dhe Serbia arritën marrëveshje për Deklaratën e përbashkët për personat e zhdukur, në kuadër të dialogut për normalizimin e marrëdhënieve, të ndërmjetësuar nga BE.

Palët në këtë deklaratëu zotuan për qasje të plotë në informacione të besueshme, mes tyre edhe ato me status të klasifikuar, vënien në dispozicion të të gjitha dokumenteve me rëndësi për përcaktimin e fatit të personave të zhdukur, si dhe për punën e përbashkët përmes një komisioni të kryesuar nga BE-ja.

Por, deri më tani, asnjë prej këtyre nuk është realizuar në praktikë.

Në Kosovë ende nuk dihet fati i rreth 1.600 personave të zhdukur që nga periudha e luftës së fundit.

Tutje, zv/kryeministri Bislimi tha se i dërguari i posaçëm i BE-së për dialogun Kosovë-Serbi, Miroslav Lajçak, ka dënuar sulmin në kanalin e Ibër-Lepencit në veri të Kosovës dhe po ashtu ka treguar që BE-ja është e gatshme të ndihmojë në hetimin e plotë të këtij rasti.

Për herë të fundit, Bislimi dhe Petkoviq u takuan në muajin tetor, ku nuk u arrit ndonjë rezultat konkret drejt zbatimit të marrëveshjes së Brukselit dhe aneksit të Ohrit.